د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د بدخشان امنيت ټينګښت لپاره د ولسي ځواک رول اغېزمن دى

د بدخشان امنيت ټينګښت لپاره د ولسي ځواک رول اغېزمن دى

Oct 04, 2015 - 15:49

فيض اباد (پژواک، ١٢ تله ٩٤): د هېواد د وسله والو ځواکونو لوى درستيز بدخشان ولايت ته د خپل سفر په ترڅ کې په نږدې راتلونکي کې په ياد ولايت کې د طالبانو تر ولکې لاندې د سيمو له پاکولو، د زر کسيز ولسي ځواک له رامنځته کولو او په دغه ولايت کې د کومانډو ځواکونو د دوو قطعو له مېشتولو خبر ورکړ.

ډګر جنرال قدم شاه شهيم چې بدخشان ولايت ته يې سفر کړى، له سيمه ييزو چارواکو او د ولايتي شورا له غړو او مخورو سره د ليدنې پر مهال وويل چې امنيتي ځواکونه به په نږدې راتلونکي کې د طالبانو له لوري ټولې نيول شوې سيمې، يو ځل بيا د هغوى له شتونه پاکې کړي.

هغه زياته کړه چې د بهارک ولسوالۍ د وسله والو مخالفينو له ولکې ايستل شوې او ډېر ژر به د وردوج ولسوالۍ هم د امنيتي ځواکونو له لوري ونيول شي.

بهارک ولسوالۍ دوه شپې وړاندې د طالبانو له لوري ونيول شوه چې پر سبا يې يو ځل بيا د لسو پخوانيو جهادي قوماندانانو تر امر لاندې د سلګونه کسانو او امنيتي ځواکونو له لوري، د طالبانو له ولکې و ايستل شوه، خو د وردوج ولسوالۍ چې درې ورځې وړاندې د طالبانو له لوري نيول شوې؛ تر اوسه پورې د دوى تر کنټرول لاندې ده.

د هېواد د وسله والو ځواکونو لوى درستيز وايي چې ډېر ژر به د بدخشان د امنيت ساتلو په موخه په دغه ولايت کې د زر کسيز ولسي ځواک کار هم پيل کړي.

هغه وويل چې دغه ځواکونه به د امنيه قوماندانۍ په چوکاټ کې تنظيم شي او د يادې قوماندانۍ له لوري به اداره کېږي.

شهيم زياته کړه چې د ياد زر کسيز ولسي ځواک وسلې او مهمات به د امنيه قوماندانۍ او معاشونه به يې د ياد ولايت د ملي امنيت رياست له لوري ورکول کېږي. هر کس به د مياشتې لس زره افغانۍ معاش او څلور زره افغانۍ بدل اعاشه ترلاسه کړي.

د هغه په وينا، ډېر ژر به د يادو ځواکونو د تنظيم په موخه د کورنيو چارو وزارت او سيمه ييزو ارګانونو ادارې يو پلاوى، بدخشان ولايت ته سفر وکړي.

د روان کال په لومړيو کې د پخوانيو جهادي قوماندانانو په ګډون سلګونو کسان د فيض اباد په ښار کې سره راټول شول او د ياد ولايت د امنيت په موخه يې د زرو کسانو د ګومارنې وړانديز وکړ او ويل يې چې ياد ځواکونه به په خپلو سيمو کې ځاى پر ځاى وي، ځکه چې دوى د نورو په پرتله په خپلو سيمو کې ښه بلد دي او د وسله والو ځواکونو په ښه ځپلو کې اغېزناکې پايلې لرلى شي.

د بدخشان ولايتي شورا د دغه ډول ځواکونو رامنځته کول د امنيت او خلکو په ګټه بولي.

د بدخشان ولايتي شورا مشر عبدالله ناجي نظري پژواک خبري اژانس ته وويل چې د بهارک ولسوالۍ په بېرته نيولو کې ولسي ځواکونو اغېزناک رول درلود.

نوموړي د پوځي تجهيزاتو او وسايلو کمښت او د امنيتي ځواکونو تر منځ د همغږۍ نه شتون؛ د وردوج او بهارک ولسواليو د سقوط لامل وبلل او زياته يې کړه چې امنيتي ځواکونه بايد غښتلي او د دوى تر منځ پوره همغږي رامنځته شي.

د وسله والو ځواکونو لوى درستيز وويل چې په بهارک ولسوالۍ او د بدخشان په مرکز فيض اباد ښار کې به په نږدې راتلونکي کې د ملي اردو د کومانډو دوه قطعې ځاى پر ځاى کړي او تر څنګ به يې دوه هليکوپټرې په فيض اباد ښار کې د همېش لپاره شتون ولري.

د ويلو ده چې د کورنيو چارو وزارت دوه ورځې وړاندې د يوې خبرپاڼې په خپرولو سره ويلي چې د بهارک جګړې د هوايي بريد په پايله کې د طالبانو د نومول شوي والي فصيح الدين په ګډون څلوېښت وسله وال وژل شوي دي.

خو طالبانو بيا د قاري فصيح الدين وژنه رد کړې او هغه يې يوازې د دولت تبليغات ګڼلي دي.

د بدخشان امنيتي چارواکي وايي چې د وژل شوو کسانو په ډله کې بهرنيان هم شامل دي چې تر اوسه پورې يې هويت نه دى په ډاګه شوى.

ورته راپورونه:


Download “Pajhwok” mobile App, on your smartphone to read and access latest news, features, interviews, videos and photos about Afghanistan.

   

اعلانونه

Advertisement