د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د فوټبال ملي لوبډلې د فزیکي ځواک لوړولو لپاره کړنلارې جوړېږي

د فوټبال ملي لوبډلې د فزیکي ځواک لوړولو لپاره کړنلارې جوړېږي

Aug 01, 2017 - 16:59

کابل (پژواک، ١٠ زمرى ٩٦): د افغانستان فوټبال فدراسيون وايي چې په ملي لوبډله کې ډېر استعدادونه شته، مګر فزیکي ځواک یي تر نورو نړیوالو لوبډلو ټیټ دى.

دغه څرګندونې د افغانستان فوټبال فدراسيون مسوولينو د زمري په ١٠مه په کابل کې د يوې خبري غونډې پر مهال وکړې.

د فوټبال ملي لوبډلې مشر روزونکي اوتو فيستر وويل، د فوټبال ملي لوبډله کافي اندازه سپورټي مهارتونه لري، مګر د دوی فزیکي ځواک تر نورو ډېر کمزوری دى او د فزیکي ځواک د لوړولو لپاره يې د فوټبال له ملي فدراسیون سره په ګډه پر لنډمهاله او اوږود مهاله کړنلارو کار کوي.

د هغه په وينا، د فوټبال له فدراسيون سره په همکاری په پام کې لري چې په راتلونکي کې د فوټبال ملي ټېم د سپورټي وړتیاوو لوړولو په موخه له نړیوالو ټېمونو سره دوستانه او رسمي لوبې په لار واچوي.

نوموړی د فوټبال ملي لوبـډلې وروستیو سياليو ته په اشارې سره وویل: «د فوټبال لوبو پر وړاندې باید احساساتي چلند ونه شي، د ویتنام پر وړاندې د ملي ټېم بریا ټول خلک خوښ کړل، مګر د کمبودیا پر وړاندې له لوبې بایللو وروسته پر لوبغاړو نيوکې زیاتې شوې.»

هغه وویل: «افغانستان کې جګړو او سیاسي بې ثباتیو د فوټبال لوبه هم اغېزمنه کړې، هڅه مو دا ده چې لوبډله له سیاست لرې وساتو.»

د ملي لوبډلې دغه الماني روزونکي فیسټر د لوبغاړو ترمنځ یووالی او همغږي د بریا ضامن وبلل او زیاته يې کړه چې ملي لوبډله د تېر په نسبت ډېره همغږي لري.

د افغانستان فوټبال فدراسیون سکرتر جنرال علیرضا اقازاده وويل چې د فوټبال د معیاري کولو لپاره د اسیا فوټبال فدراسیون او د فوټبال نړیوالې ادارې (فیفا) په مرسته پر درې کلن پلان کار کوي چې ډېر ژر به دغه ستراتیژي اعلان شي.

نوموړی وايي، د درې کلن پلان په مرسته ۱۳۹۷ لمريز کال کې د لوبغاړو د استعدادونو د ودې په موخه د ۱۴ کلنو او ۱۶ کلنو لوبغاړو لپاره هم ټېمونه جوړوي.

هغه زیاتوي: «د فوټبال فدراسیون له لوري د الکوزي شرکت په مالي مرسته د ملي ټېم لپاره ۲۵ کسیزه لوبډله روزو، یادو لوبغاړو ته د تنخوا، خوراک، لباس او تعلیم آسانتیاوې هم په پام کې نیول شوي.»

د افغانستان د فوټبال فدراسیون تخنیکي مرستیال محمدیوسف کارګر وویل، د فوټبال لوبې معیاري کول د ورځو او میاشتو کار نه ده، کلونه وخت نیسي څو د یوې پیاوړې لوبډلې شاهدان و اوسو.

هغه وايي، د معیاري لوبډلې د روزلو لپاره سالم مدیریت، په لوبغاړو پانګونه، معیاري لوبغالي او روزنیز کلبونه اړین دي چې لا هم زموږ په واک کې نشته.

کارګر د فوټبال ملي فدراسیون او ولایتي فدراسیونونو ترمنځ اختلافونو ته په اشارې سره وویل چې فوټبال فدراسیون د قانون له مخې رڼو او بېطرفه ټاکنو ته ژمن دى، خو د ملي شورا د استازو له لوري د فدراسیون په چارو کې مداخله د ټاکنو د ځنډ باعث شوی.

دا په داسې حال کې ده چې د افغانستان د ٢٢ ولايتونو د فوټبال مسوولينو د زمري په ٧مه په کابل کې د يوې خبري غونډې پر مهال د فوټبال فدراسیون په مشر تور پورې کړ چې کاري موده يې له يو کال راهيسې پوره شوې، خو ټاکنې نه ترسره کوي.

ورته راپورونه:


Download “Pajhwok” mobile App, on your smartphone to read and access latest news, features, interviews, videos and photos about Afghanistan.

   

نظر ورکړئ

اعلانونه

Advertisement