د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د بلخ ولایتي شورا د غړي محمد اصف مومند دنده ځنډول شوې

دولت او سياست

اصف مومند او عطاء محمد نور

د بلخ ولایتي شورا د غړي محمد اصف مومند دنده ځنډول شوې

Aug 14, 2017 - 17:22

مزارشريف (پژواک ۲۳ زمری، ۹۶): د بلخ ولايتي شورا د وکيل محمد اصف مومند دنده يې د غير حاضرۍ له امله ځنډولې خو مومند وايي چې ولايتي شورا دغه پرېکړه د بلخ د والي عطامحمد نور د فشار په پايله کې کړې ده.

د بلخ ولايتي شورا رييس ډاکتر محمدافضل حديد د زمري په ۲۳مه پژواک خبري اژانس ته وويل چې د دغې شورا وکيل محمد اصف مومند له تېرو څلور مياشتو يوه ورځ هم شورا ته نه دی راغلی.

نوموړي زياته کړه چې د ولايتي شورا د داخلي طرزالعمل او د ولايتي شورا د قانون له مخې دوی مسووليت درلود چې پر وړاندې يې تصميم ونيسي.

د هغه په وينا، د ولايتي شورا له دوه ثلثه ډېرو وکيلانو په تصميم شورا قانوني حق لري چې د يو وکيل له درې مياشتنۍ غير حاضرۍ وروسته د هغه دنده وځنډوي.

د ولايتي شورا رييس وويل: ((د اصف مومند پر وړاندې د ولايتي شورا له اتلس وکيلانو څوارلسو لاسليک وکړ چې بايد دنده يې وځنډول شي.))

نوموړي زياته کړه چې پر همدې بنسټ يې د ټاکنو خپلواک کمېسيون او سيمه ييزو ارګانونو ادارې ته رسمي مکتوبونه لېږلي چې د محمد اصف مومند امتيازات او معاشونه بند کړي او پر ځای يې بل کس چې په ټاکنو کې يې لوړه رايه اخيستې وي، د وکيل په توګه دوی ته معرفي کړي.

خو محمد اصف مومند له پژواک خبري اژانس سره په همدې تړاو خبرو کې وويل چې دی د خلکو په رايه وکيل شوی او هېڅ وکيل يې د منفک کېدو حق نه لري.

نوموړی منی چې درې مياشتې ولايتي شورا ته نه دی ورغلی خو وايي چې له وطنه هم بهر نه وو او دغه موده يې ټوله د خپل سياسي مجبوريت له امله په کابل کې تېره کړې ده.

د هغه په وينا، د کومو درې مياشتو د غير حاضرۍ له امله چې د ده دنده ځنډول شوې، د هماغو مياشتو امتيازات او معاشونه يې اخيستي دي.

مومند د ولايتي شورا د يادې پرېکړې تر شا د بلخ والي عطامحمد نور لاس لرلو يادونه وکړه.

نوموړي زياته کړه: ((استاد عطامحمد نور له ما سره له وروستيو جنجالونو وروسته پر ولايتي شورا دغه کار کړی دی، استاد عطا زما وظيفه په تعليق کې راوستې ده.))

خو د بلخ د والي عطامحمد نور وياند منير فرهاد پژواک خبري اژانس ته وويل چې دوی د محمد اصف مومند د چارو او کړنو په اړه هېڅ ويلو ته اړتيا نه ويني.

نوموړي زياته کړه چې ولايتي شورا بېله اداره ده او خپل تصميمونه په خپله د قانون په رڼا کې نيسي.

د هغه په وينا، دوی هېڅکله د ولايتي شورا په چارو کې لاسوهنه نه ده کړې.

خو منير وويل چې د محمد اصف مومند پر وړاندې ولايتي شورا د قانون له مخې تصميم نيولی او ولايت مقام يې ملاتړ کوي.

بلخوا د بلخ د ټاکنو کمېسيون وايي چې تر دې دمه د محمد اصف مومند په نامه دوی ته کوم مکتوب نه دی رسېدلی.

د دغه ولايت د ټاکنو کمېسيون مسوول ضياءالدين حياتي پژواک خبري اژانس ته وويل چې دوی اجرائيوي صلاحيت لري، که چېرې د بلخ ولايتي شورا مکتوب دوی ته ورسېږي، نو دوی به يې د ټاکنو کمېسيون مرکزي دفتر دارالانشا ته وړاندې کړي.

نوموړي زياته کړه چې د ولايتي شورا ګانو د قانون له مخې که چېرې يو وکيل درې مياشتې په مسلسل ډول غير حاضر وي نو د قانون له مخې ولايتي شورا حق لري، چې پر وړاندې يې تصميم ونيسي.

محمد اصف مومند د بلخ ولايت د بلخ ولسوالۍ د وزير اباد کلي اوسېدونکی دی، چې د ولايتي شورا په تېرو ټاکنو کې د بلخ ولايتي شورا ته بريالی شوو.

نوموړی له تېرو شپږ مياشتو له بلخ والي سره په سياسي مخالفت کې ښکېل شوى چې له امله يې بار بار د والي پر خلاف سياسي څرګندونې کړي او هغه يې د ځمکو پر غصب او پر اداري فساد تورن کړی دی.

مومند له تېرو څلورو مياشتو راهيسې په کابل کې اوسېږي.

ورته راپورونه:


Download “Pajhwok” mobile App, on your smartphone to read and access latest news, features, interviews, videos and photos about Afghanistan.

   

نظر ورکړئ

اعلانونه

Advertisement